ភ្នំពេញ ថ្ងៃទី១៣ ខែវិច្ឆិកា ឆ្នាំ២០២៥៖ ក្រុមហ៊ុន រ៉ូយ៉ាល់ គ្រុប ដែលជាក្រុមហ៊ុនពហុផលិតផលដ៏ធំ និងមានការវិនិយោគចម្រុះឈានមុខគេនៅកម្ពុជា បានសហការជាមួយក្រសួងការងារ និងបណ្តុះបណ្តាលវិជ្ជាជីវៈ តាមរយៈការចុះហត្ថលេខាលើអនុស្សរណៈនៃការយោគយល់ ដើម្បីជំរុញការអភិវឌ្ឍកម្លាំងពលកម្ម លើកកម្ពស់បរិយាបន្នហិរញ្ញវត្ថុ ក៏ដូចជាបង្កើនឱកាសការងារដល់ប្រជាជនខ្មែរទូទាំងប្រទេស។
ពិធីចុះហត្ថលេខានេះ ត្រូវបានរៀបចំឡើងនៅអគារ ធនាគារ វីង ថៅវើ ក្រោមអធិបតីភាពដ៏ខ្ពង់ខ្ពស់នៃ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និង អ្នកឧកញ៉ា គិត ម៉េង ប្រធានក្រុមប្រឹក្សាភិបាល និងជាអគ្គនាយកប្រតិបត្តិក្រុមហ៊ុន រ៉ូយ៉ាល់ គ្រុប។ ភាពជាដៃគូនេះ គឺជាការប្តេជ្ញាចិត្តរួមគ្នាក្នុងការជួយពង្រឹងសមត្ថភាពកម្លាំងពលកម្មកម្ពុជា និងធ្វើការរួមគ្នាឱ្យកាន់តែជិតស្និទ្ធរវាងគោលនយោបាយរដ្ឋាភិបាល និងគំនិតច្នៃប្រឌិតថ្មីៗរបស់វិស័យឯកជន។
ឯកឧត្តម ហេង សួរ បានសង្កត់ធ្ងន់ពីសារៈសំខាន់រយៈពេលវែងនៃកិច្ចសហការនេះថា៖ «ភាពជាដៃគូនេះគូសបញ្ជាក់យ៉ាងច្បាស់ថា វិស័យឯកជនអាចដើរតួនាទីយ៉ាងសំខាន់ក្នុងការកសាងកម្លាំងពលកម្មដែលមានសមត្ថភាព និងអាចសម្របខ្លួនបានទៅតាមតម្រូវការការងារជាក់ស្តែង។ តាមរយៈការធ្វើការរួមគ្នានេះ យើងមិនត្រឹមតែអភិវឌ្ឍកម្លាំងពលកម្មដើម្បីឆ្លើយតបនឹងតម្រូវការនាពេលបច្ចុប្បន្នប៉ុណ្ណោះទេ តែក៏ជាការកសាងគ្រឹះសម្រាប់អនាគតដ៏រីកចម្រើនរបស់កម្ពុជាផងដែរ។»
ភាពជាដៃគូនេះកើតឡើងចំពេលដែលសេដ្ឋកិច្ចកម្ពុជាកំពុងស្ថិតក្នុងដំណាក់កាលដ៏សំខាន់មួយ។ ដ្បិតថាកំណើនសេដ្ឋកិច្ចនៅតែមានស្ថិរភាព ប្រទេសកម្ពុជាក៏កំពុងប្រឈមមុខនឹងសម្ពាធកើនឡើងពីការរំខាននៃពាណិជ្ជកម្មក្នុងតំបន់ បន្ទាប់ពីភាពតានតឹងនាពេលថ្មីៗនេះជាមួយប្រទេសថៃ ដោយបានបង្កផលប៉ះពាល់ដល់ពាណិជ្ជកម្មឆ្លងប្រទេស ហើយខ្សែសង្វាក់ផ្គត់ផ្គង់មានការរអាក់រអួល។ ទន្ទឹមនឹងនេះ ការប្រកួតប្រជែងជាសកល និងបរិវត្តកម្ម ឌីជីថលយ៉ាងឆាប់រហ័ស កំពុងធ្វើឱ្យទីផ្សារការងារនៅក្នុងតំបន់អាស៊ីអាគ្នេយ៍មានការវិវត្តគួរឱ្យកត់សម្គាល់ផងដែរ។ យ៉ាងនេះក្តី ឧបសគ្គទាំងនេះក៏បានផ្តល់ឱកាសថ្មីៗផងដែរ ពោលគឺតាមរយៈការវិនិយោគលើការបណ្តុះបណ្តាលជំនាញ នវានុវត្តន៍ និងការជំរុញកំណើបរិយាបន្នហិរញ្ញវត្ថុ កម្ពុជាអាចពង្រឹងភាពធន់របស់ខ្លួន ទាក់ទាញការ វិនិយោគ ក៏ដូចជាពង្រឹងកម្លាំងពលកម្មរបស់ខ្លួនឱ្យមានសមត្ថភាពប្រកួតប្រជែងទាំងក្នុងកម្រិតតំបន់ និងសកលលោក។
អ្នកឧកញ៉ា គិត ម៉េង បានបង្ហាញការជឿជាក់យ៉ាងមុតមាំថា ភាពជាដៃគូនេះគឺជាការបើកទំព័រថ្មីមួយនៃកិច្ច សហការរវាងក្រុមហ៊ុនឯកជន និងរដ្ឋ។ អ្នកឧកញ៉ា គិត ម៉េង មានប្រសាសន៍ថា៖ «ចក្ខុវិស័យរបស់យើងមិនត្រឹមតែបង្កើតឱកាសការងារប៉ុណ្ណោះទេ តែយើងខិតខំធ្វើយ៉ាងណារួមចំណែកកសាងអនាគតកម្ពុជាឱ្យកាន់តែភ្លឺស្វាង។ តាមរយៈការរួមបញ្ចូលគ្នានូវភាពខ្លាំងរវាងរដ្ឋ និងឯកជន យើងកំពុងវិនិយោគលើធនធានមនុស្ស បំពាក់បំប៉ននូវជំនាញ និងមធ្យោបាយចាំបាច់ដើម្បីជោគជ័យក្នុងយុគសម័យឌីជីថល និងជួយឱ្យប្រទេសរីកចម្រើនប្រកបដោយបរិយាបន្ន។»
តាមរយៈការចុះអនុស្សរណៈនៃការយោគយល់នេះ ស្ថាប័នទាំងពីរនឹងសហការគ្នាលើសសរស្តម្ភយុទ្ធសាស្ត្រ ចំនួន ៤ រួមមាន៖ ការលើកកម្ពស់កិច្ចសហការប្រកបដោយប្រសិទ្ធភាពរវាងរដ្ឋ និងឯកជន ការជំរុញបរិយាបន្នហិរញ្ញវត្ថុ ការបង្កើតឱកាសការងារដល់ប្រជាជនកម្ពុជា ព្រមទាំងកែលម្អការអប់រំសម្រាប់អភិវឌ្ឍកម្លាំងពលកម្ម ក្នុងគោលដៅបណ្តុះបណ្តាលកម្លាំងពលកម្មអាចប្រកួតប្រជែងប្រកបដោយភាពស្វាហាប់ និងត្រៀមខ្លួនសម្រាប់អនាគត។ គំនិតផ្តួចផ្តើមនេះ គឺស្របតាមចក្ខុវិស័យរបស់ក្រុមហ៊ុន រ៉ូយ៉ាល់ គ្រុប ក្នុងការប្រែក្លាយការអភិវឌ្ឍធនធានមនុស្ស ឱ្យក្លាយជាកម្លាំងចលករជំរុញវឌ្ឍនភាពជាតិ។
ក្រុមហ៊ុន រ៉ូយ៉ាល់ គ្រុប នឹងធ្វើការយ៉ាងជិតស្និទ្ធជាមួយក្រសួងការងារ បណ្តុះបណ្តាល និងវិជ្ជាជីវៈ ដើម្បីរៀបចំកម្មវិធីបណ្តុះបណ្តាលដែលសមស្របតាមតម្រូវការឧស្សាហកម្ម ក្នុងវិស័យសំខាន់ៗដូចជា៖ ហិរញ្ញវត្ថុ បច្ចេកវិទ្យាគមនាគមន៍និងព័ត៌មាន ទូរគមនាគមន៍ ថាមពល និងបដិសណ្ឋារកិច្ច ដោយអាចធានាថាកម្លាំងពលកម្មកម្ពុជាមានលទ្ធភាពឆ្លើយតបទៅកំណើនតម្រូវការ ស្របតាមបរិការណ៍សេដ្ឋកិច្ចក្នុងយុគសម័យបដិវត្តន៍ឧស្សាហកម្ម ៤.០។ ក្រុមហ៊ុន រ៉ូយ៉ាល់ គ្រុប ក៏នឹងគាំទ្រដល់គំនិតផ្តួចផ្តើម បណ្តុះបណ្តាលគ្រូបង្គោល និងពង្រឹងការអប់រំបណ្តុះ បណ្តាលបច្ចេកទេស និងវិជ្ជាជីវៈ (TVET) ព្រមទាំងផ្តល់ការគាំទ្រលើកកម្ពស់ជំនាញឌីជីថលសំខាន់ៗ ដូចជា៖ បញ្ញាសិប្បនិម្មិត ឬហៅថា AI បចេ្ចកវិទ្យាក្លោដ ការវិភាគទិន្នន័យ រ៉ូបូត និងបច្ចេកវិទ្យាស្វ័យប្រវត្តិកម្មជាដើម ដែលទាំងអស់នេះស្របតាមរបៀបវារៈនៃការចាប់យកបរិវត្តកម្មឌីជីថលរបស់កម្ពុជាផងដែរ។
ដើម្បីពង្រឹងបទពិសោធន៍ជាក់ស្តែង ក្រុមហ៊ុន រ៉ូយ៉ាល់ គ្រុប នឹងណែនាំគំរូកម្មវិធីហ្វឹកហ្វឺន «រៀនផង ធ្វើការផង» ដែលមានរចនាសម្ព័ន្ធច្បាស់លាស់ ដោយបញ្ចូលការអប់រំក្នុងថ្នាក់រៀនជាមួយនឹងបទពិសោធន៍នៅកន្លែងធ្វើការ ព្រមទាំងមានការណែនាំ និងការផ្តល់វិញ្ញាបនបត្រដែលអនុលោមតាមក្របខណ្ឌគុណវុឌ្ឍិជាតិកម្ពុជា (CQF)។ ក្នុងពេលជាមួយគ្នានេះ គំនិតផ្តួចផ្តើមដូចជា ការធ្វើតេស្តវាយតម្លៃសមត្ថភាព (RPL) នឹងផ្តល់ឱកាសសម្រាប់កម្មករនិយោជិតក្នុងការធ្វើឱ្យជំនាញរបស់ពួកគេទទួលស្គាល់ជាផ្លូវការ ហើយជួយឱ្យអាជីពការងាររបស់ពួកគេកាន់តែប្រសើរទៀតផង។
ភាពជាដៃគូនេះក៏នឹងបង្កើតវិធីសាស្ត្រជាក់ស្តែងនៅក្នុងដំណើរការការងារ ដោយរាប់ចាប់ផ្តើមពីការជ្រើសរើសនិងការផ្គូផ្គងការងារ រហូតដល់កម្មវិធីអាជីពការងារប្រកបដោយបរិយាបន្ន រួមបញ្ចូលទាំងការផ្តល់ការងារដល់ក្រុមងាយរងគ្រោះផងដែរ។ ក្រុមហ៊ុន រ៉ូយ៉ាល់ គ្រុប នឹងផ្តល់ការគាំទ្រផ្នែកហិរញ្ញវត្ថុ និងភស្តុភារសម្រាប់ការរៀបចំព្រឹត្តិការណ៍ការងារ ការផ្សព្វផ្សាយឌីជីថល ក៏ដូចជាការបណ្តុះបណ្តាល ដើម្បីធានាថាឱកាសការងារទាំងអស់ មានភាពងាយស្រួល ត្រូវបានផ្សព្វផ្សាយទូលំទូលាយ និងមាននិរន្តរភាពសម្រាប់មនុស្សគ្រប់គ្នា។ ជាមួយគ្នានេះ ស្ថាប័នទាំងពីរនឹងធ្វើការដើម្បីលើកកម្ពស់ការយល់ដឹងកាន់តែច្បាស់អំពីយន្តការដោះស្រាយវិវាទការងារ និងពង្រឹង សមត្ថភាពតំណាងកម្មករនិយោជិត ដើម្បីជំរុញកិច្ចសន្ទនាសង្គមប្រកបដោយភាពស្ថាបនា និងរក្សាបាននូវទំនាក់ទំនងវិជ្ជាជីវៈដែលចុះសម្រុងគ្នា។
លើសពីការត្រៀមលក្ខណៈសម្រាប់កម្លាំងពលកម្ម កិច្ចសហការនេះក៏គ្របដណ្តប់លើការគាំពារសង្គម និងបច្ចេកវិទ្យាឌីជីថលប្រកបដោយបរិយាបន្ន តាមរយៈការរៀបចំប្រព័ន្ធ ប.ស.ស. (NSSF) ឱ្យកាន់តែទំនើប ដោយប្រើប្រាស់ដំណោះស្រាយទូទាត់ឌីជីថលដែលមានសុវត្ថិភាព និងរហ័ស ដែលធ្វើឱ្យការទូទាត់សម្រាប់សមាជិក ក្រុមអ្នកផ្តល់សេវាសុខាភិបាល និងសិស្សានុសិស្សកាន់តែមានភាពងាយស្រួល។ ការងារនេះនឹងត្រូវបានបំពេញបន្ថែមតាមរយៈយុទ្ធនាការអប់រំសាធារណៈដែលរៀបចំឡើងដើម្បីពង្រីកវិសាលភាពនៃការធានារ៉ាប់រងសន្តិសុខសង្គម និងលើកកម្ពស់ចំណេះដឹងផ្នែកហិរញ្ញវត្ថុឌីជីថលទូទាំងប្រទេស។
ក្រុមហ៊ុន រ៉ូយ៉ាល់ គ្រុប ដែលជាក្រុមហ៊ុនពហុផលិតផលដ៏ធំ និងមានការវិនិយយោគចម្រុះឈានមុខគេនៅ កម្ពុជា ជាមួយនឹងការវិនិយោគនៅក្នុងវិស័យទូរគមនាគមន៍ ធនាគារ ថាមពល ប្រព័ន្ធផ្សព្វផ្សាយ បដិសណ្ឋារកិច្ច និងអចលនទ្រព្យជាដើម បានរួមចំណែកកសាង និងការអភិវឌ្ឍជាតិជាយូរមកហើយ។ អនុស្សរណៈនៃការ យោគយល់នេះបានបញ្ជាក់ពីគោលជំហរបស់ក្រុមហ៊ុន រ៉ូយ៉ាល់ គ្រុប បន្ថែមទៀតក្នុងការជំរុញកំណើនប្រកបដោយនិរន្តរភាព និងលើកកម្ពស់ជីវភាពរស់នៅប្រជាជនកម្ពុជា តាមរយៈនវានុវត្ត កាលានុវត្តភាព និងភាពជាដៃគូដែលនាំមកនូវវឌ្ឍនភាពដ៏ត្រចះត្រចង់សម្រាប់សហគមន៍ និងប្រទេសជាតិ៕
