បច្ចុប្បន្ន វិស័យចម្រៀង K-pop មានឥទ្ធិពលគ្របដណ្តប់ជាសកល ខណៈនៅកម្ពុជាយើងក៏មានការពេញនិយមខ្លាំងពីសំណាក់យុវវ័យផងដែរ។ ពួកគេបានបង្កើតក្រុមរាំជាបន្តបន្ទាប់ និង បង្ហាញទេពកោសល្យតាមរយៈការរាំ Dance Cover បទចម្រៀង K-pop ផ្សេងៗ ដែលមើលមកដូចអ្នកអាជីពពិតៗ។
ជាមួយការបង្កើតក្រុមនេះ ក៏បានធ្វើឱ្យពួកគេមានទីផ្សារនៅក្នុងពិភពសិល្បៈរាប់តាំងពី វិស័យម៉ូដ សម្តែង ចម្រៀង និង ពាណិជ្ជកម្មជាដើម។ ចំណោមក្រុមរាំលេចធ្លោនៅកម្ពុជា យើងសូមលើកពីក្រុមរាំនារីចំនួនពីរក្រុម ដែលពួកគេមានសមាជិកសុទ្ធតែអ្នកមានទេពកោសល្យ ពហុជំនាញ បើសម្រស់វិញ គឺមិនចាញ់តារាលំដាប់កំពូលឡើយ។
១. ក្រុម Arrow Plas
ក្រុមរាំ Arrow Plas ទទួលបានការគាំទ្រខ្លាំងពីសំណាក់យុវវ័យ ខណៈក្រុមនេះមានទាំងសមាជិកស្រី និង ប្រុសសរុបគ្នាប្រមាណ ២០ នាក់។ បើនិយាយពីក្រុមនារី ដែលមានគ្នា ១០ នាក់ ឃើញថាមហាជនពិតជាចាប់អារម្មណ៍ខ្លាំងទៅលើក្បាច់រាំដ៏សិចស៊ី ស្ទីលរៀបចំខ្លួនឡូយប្លែក និង បញ្ចេញក្បាច់រាំប្រកបដោយថាមពល។ តាមការបង្ហាញខ្លួន រហូតមានភាពល្បីល្បាញដល់សព្វថ្ងៃ ក្រុមរាំ Arrow Plas បានប្រមូលផ្តុំគ្នាបង្កើតជាក្រុមរាំ មានប្រុស មានស្រី នៅក្នុងឆ្នាំ ២០១៩។ តែបើសរុបបទពិសោធតាំងពីមុនបង្កើតក្រុម ពួកគេបានរាំប្រមាណជា ១០ ឆ្នាំមកហើយ។ រាល់ថ្ងៃ Arrow Plas មិនត្រឹមតែជាក្រុមរាំឯករាជ្យ និង បើកថា្នក់បង្រៀនរាំប៉ុណ្ណោះទេ តែថែមទាំងបង្កើតក្បាច់រាំឱ្យតារាល្បីៗជួរមុខនៅកម្ពុជាផងដែរ។
២. ក្រុម OMG
OMG គឺជាក្រុមរាំនារីដ៏មានទេពកោសល្យ មានមេក្រុមដ៏ពូកែ បង្កើតឡើងតំាងពីឆ្នាំ ២០១១។ ពីមួយឆ្នាំទៅមួយឆ្នាំពួកគេមានការអភិវឌ្ឍន៍ខ្លាំង មិនថាសមត្ថភាពសម្តែង ស្ទីលរៀបចំខ្លួន និង រូបសម្រស់។ កន្លងមក OMG តែងចេញសម្តែងក្នុងកម្មវិធីតូចធំ ជាពិសេស កម្មវិធីនៅក្រៅប្រទេស រួមទាំងបានប្រកួតរាំឈ្នះពានរង្វាន់លំដាប់អន្តរជាតិ ធ្វើឱ្យកម្ពុជាមានភាពល្បីល្បាញផងដែរ។ បច្ចុប្បន្ន ក្រុមនេះមានទីផ្សារខ្លាំងនៅក្នុងវិស័យសិល្បៈ មិនថាបង្ហាញម៉ូដ ថតកម្មវិធី សម្តែង និង ពាណិជ្ជកម្មផ្សេងៗ៕
