ថ្មីៗនេះ ប្រទេសមីយ៉ាន់ម៉ាកំពុងមានការផ្ទុះជំងឺអាសន្នរោគប្រមាណជា ៣០០ ករណី នៅក្នុងភូមិ Shwe Kokko ស្រុក Myawaddy រដ្ឋ Karen ខេត្ត Myawaddy ដោយក្នុងនោះអ្នកជំងឺ ៥៦ នាក់មានរោគសញ្ញាធ្ងន់ធ្ងរ និង ២ នាក់ទៀតបានស្លាប់បាត់បង់ជីវិត។
យ៉ាងណាមិញ ដោយសារតែតំបន់ខាងលើនេះស្ថិតនៅជាប់ព្រំប្រទល់ភូមិ Ban Wang Pha ឃុំ Mae Charo ស្រុក Mae Ramat ខេត្ត Tak ប្រទេសថៃ ទើបធ្វើឱ្យខាងប្រទេសថៃកើតការព្រួយបារម្ភចំពោះការផ្ទុះឆ្លងមកដល់ប្រទេសខ្លួន ហើយក៏បានព្យាយាមត្រៀមរួចរាល់ក្នុងការតទល់ចំពោះជំងឺអាសន្នរោគនេះ។ ក្នុងនោះ ក្រសួងសុខាភិបាលរបស់ថៃចេញបញ្ជាឲ្យបង្កើតមជ្ឈមណ្ឌលប្រតិបត្តិការសង្គ្រោះបន្ទាន់ (EOC) នៅក្នុងខេត្ត Tak ដើម្បីដោះស្រាយស្ថានការណ៍នេះ។ ចំណែកឯទាហានរបស់ថៃដែលជាអង្គភាពក្នុងតំបន់វិញ បានទទួលខុសត្រូវលើវិធានការរៀបចំតំបន់ព្រំដែន ដើម្បីគាំទ្រដល់ចំណាត់ការរបស់ក្រសួងសុខាភិបាលក្នុងការបង្ការ និង ទប់ស្កាត់ជំងឺនេះ។
ចំពោះវិធានការណ៍រួមមានការផ្អាកការចេញចូលរបស់ពលរដ្ឋរវាងពលរដ្ឋទាំងសងខាងនៅតាមបណ្តោយព្រំដែនពីស្រុក Phop Phra ស្រុក Mae Sot ស្រុក Mae Ramat ក្នុងរយៈពេលមួយខែ ឬរហូតដល់ស្ថានភាពនឹងនរឡើងវិញ បង្កើនភាពតឹងរ៉ឹងក្នុងការចុះល្បាត បង្កើនវិធានការថែទាំសុខភាពបុគ្គលិកបំពេញបេសកកម្មនៅតាមព្រំដែន និង បង្កើនភាពតឹងរ៉ឹងទៅលើអនាម័យរបស់អ្នកបើកបរដឹកជញ្ជូនឆ្លងដែន៕
ប្រភព៖ Js100
