នៅថ្ងៃទី ៣១ ខែកក្កដា ឆ្នាំ ២០២៥ នេះ នៅឯប្រទេសថៃ មានករណីផ្លូវល្បឿនលឿនមួយខ្សែ បានស្រុតបាក់នៅត្រង់ចំណុចមួយក្នុងខេត្តតាក បង្កជាការខូចខាត និង មានការជ្រួលច្របល់យ៉ាងខ្លាំងចំពោះអ្នកដំណើរ។
តាមព័ត៌មានបានឱ្យដឹងថា ផ្លូវបេតុងល្បឿនលឿនមួយខ្សែនេះមានប្រវែងជាង ២ គីឡូម៉ែត្រ ដែលភ្ជាប់ស្រុកមេស៊ត ទៅកាន់ស្រុកមឿងតាក ក្នុងខេត្តតាក ប្រទេសថៃ។ សម្រាប់ចំណុចដែលបានបាក់ស្រុតនៃផ្លូវនេះ គឺក្នុងជម្រៅដល់ទៅ ២.៥ ម៉ែត្រ ហើយក៏បានបន្តបាក់ថែមទៀតជារឿយៗ បង្កឱ្យមានការចលាចល និង រាំងស្ទះដល់ការធ្វើដំណើរ។
ភ្លាមៗខាងអាជ្ញាធរបានចុះទៅអន្តរាគមន៍ ដើម្បីត្រួតពិនិត្យ និង ស្វែងរកដំណោះស្រាយឱ្យបានឆាប់រហ័សផងដែរ។ យ៉ាងណាមិញ មូលហេតុនៃការបាក់ស្រុត ត្រូវគេសង្ស័យថាមកពីមានភ្លៀងធ្លាក់ខ្លាំងពេកក្នុងប្រមាណថ្ងៃកន្លងមកនេះ ធ្វើឱ្យទឹកហូរទៅខាងក្រោម រហូតបង្កឱ្យមានការបាក់ផ្លូវបែបនេះ។ ស្របគ្នានេះ អាជ្ញាធរថៃនៅមិនបានបញ្ជាក់ពីជនរងគ្រោះ ស្លាប់ និង របួសនៅឡើយ ដោយគ្រាន់តែបានបញ្ជូនមន្ត្រីជំនាញទៅជួសជុលផ្លូវ និង ហាមឃាត់ការធ្វើដំណើរកាត់ផ្លូវបាក់ស្រុត៕
ប្រភព៖ Khaosod
