កាលពីយប់ថ្ងៃទី ២០ ខែតុលា ឆ្នាំ ២០២៥ កន្លងទៅ សារព័ត៌មាន Koreaboo បានចេញផ្សាយថា តារាសម្ដែងប្រុសកូរ៉េ Lee Yi Kyoung ត្រូវបាននារីម្នាក់ចោទប្រកាន់ថារូបលោកជាមនុស្សមានអត្តចរិតមិនល្អ ថែមទាំងទម្លាយឆាតជាមួយគ្នាមួយចំនួនជាការបកអាក្រាតពីទង្វើមិនសមរម្យរបស់តារាប្រុសរូបនេះ។
តាមអ្វីដែលនារីរូបនោះទម្លាយ នាងបានអះអាងថា តារាប្រុស Lee Yi Kyung បានផ្ញើរូបតំបន់សំខាន់របស់លោកមកឱ្យនាង ហើយក្នុងពេលជាមួយគ្នានោះ Lee Yi Kyung ក៏បានផ្ញើសារសុំឱ្យនាងផ្ញើរូបតំបន់សំខាន់របស់នាងទៅឱ្យលោកវិញ។ មិនត្រឹមតែប៉ុណ្ណោះ Lee Ki Kyung ក៏ត្រូវបានចោទប្រកាន់ថាមានប្រើប្រាស់ពាក្យពេចន៍មិនសមរម្យទាក់ទងនឹងការរំលោភ ទំហំដើមទ្រូង និង សារសំណេរពាក់ព័ន្ធរឿងផ្លូវភេទផងដែរ។
យ៉ាងណាមិញ ស្របពេលការទម្លាយឆាតមិនសមរម្យទាំងនេះកំពុងតែផ្ទុះក្ដៅគគុកពេញបណ្ដាញសង្គមនៅប្រទេសកូរ៉េ នៅយប់ថ្ងៃទី ២០ ខែតុលា ឆ្នាំ ២០២៥ ដដែលនោះ ខាងអ្នកតំណាងរបស់តារាសម្ដែងប្រុស Lee Yi Kyung បានចេញមកបញ្ជាក់បដិសេធដាច់អហង្ការថា រាល់ការទម្លាយសារមិនសមរម្យទាំងប៉ុន្មានទាក់ទងនឹង Lee Yi Kyung គឺមិនមែនជាការពិតនោះឡើយ។ ជាមួយគ្នានោះដែរ ខាងក្រុមហ៊ុនរបស់តារាប្រុស Lee Yi Kyung ក៏នឹងចាត់វិធានការតាមផ្លូវច្បាប់លើការចោទប្រកាន់ដែលប៉ះពាល់ដល់កេរ្តិឈ្មោះ និង កិត្តិយស តារាប្រុសរូបនេះ៕
