កូនខ្មែរអស្ចារ្យណាស់! ប្រកួតដុតនំឈ្នះជ័យលាភីកំពូល វ៉ាដាច់គេក្នុងកម្មវិធីប្រកួតដ៏ធំនៅនូវែលសេឡង់

ពិតជាមិនធម្មតា ថ្មីៗនេះកូនខ្មែររស់នៅប្រទេសនូវែលសេឡង់ បានឈ្នះពានរង្វាន់កំពូលដុតនំប្រចាំឆ្នាំ 2025 Bakels Supreme Pie Awards នៅក្នុងកម្មវិធីប្រកួតម្ហូបដ៏ល្បី The Bakels New Zealand Supreme Pie Awards ។  ម្ចាស់ជ័យលាភីកំពុងផ្ទុះការចាប់អារម្មណ៍រូបនេះ គឺ លោក Samraksmey So ឬ ហៅ Sam ដែលជាម្ចាស់ហាងដុតនំ និង កាហ្វេ Rosedale Bakery & Cafe មានទីតាំងស្ថិតនៅតំបន់ Albany ក្នុងប្រទេសនូវែលសេឡង់។

ជាមួយនំផាយដំឡូងបារាំង ដែលបំផុសគំនិតពីស្ទីលបារាំង លោក Samraksmey So ម្ចាស់ជ័យលាភី បានឈ្នះពានរង្វាន់រហូតដល់ទៅ ៧ ក្នុងចំណោម ១១ ប្រភេទ នៃពានរង្វាន់ Bakels Supreme Pie Awards ដ៏មានកិត្យានុភាព។

តាមរយៈនំដ៏អស្ចារ្យមួយនេះ លោកបានច្នៃប្រឌិតឡើង បន្ទាប់ពីបានឃើញមុខម្ហូបស្ទីលបារំាងនៅក្នុងទស្សនាវដ្តីមួយ ដែលប្រើដំឡូងបារាំងជាស្រទាប់។ លោកបានបកស្រាយដែរថា ដើម្បីបាននំនេះ លោកបានប្រើពេលជៀនដំឡូង បន្ទាប់មក យកវាដាក់ទៅក្នុងថាសជាមួយប៊័រ ខ្ទឹមស និង រ៉ូស្មែរី ហើយដុតវា។ ក្រោយដុតរួច លោកបានកាត់វាជារង្វង់ យកទៅដាក់ក្នុងនំផាយ ហើយដុតម្តងទៀត ដែលពេលដុតរួច មើលពីក្រៅទៅមានលក្ខណៈស្រួយ គួរឱ្យចង់ទទួលទានបំផុត។​

គួរឱ្យដឹងដែរថា លោក Samraksmey So បានបើកហាងដុតនំចំនួនពីរនៅ តំបន់ Albany ក្នុងប្រទេសនូវែលសេឡង់។ លោកបានទិញហាងដុតនំដំបូងនៅក្នុងឆ្នាំ ២០១៩​ និង ចាប់ផ្តើមមានឈ្មោះល្បីល្បាញ ក្រោយពេលលោកឈ្នះពានរង្វាន់មេដាយប្រាក់ម្តងរួចមកហើយ នៅក្នុងកម្មវិធី The Bakels New Zealand Supreme Pie Awards ទៅលើប្រភេទនំផាយសាច់ចិញ្ច្រាំ និង ឈីស កាលពីឆ្នាំ ២០២៣។ ក្នុងឆ្នាំដដែលនេះ លោកក៏បានប្រកួតឈ្នះក្នុងកម្មវិធី Bakels Legendary Sausage Roll ជាមួយនំប៉័ងហតដក golden pastry sausage roll របស់លោកផងដែរ។ ភាពជោគជ័យនេះ តែងតែជំរុញឱ្យលោកឆ្ពោះទៅកាន់ភាពឥតខ្ចោះ និង ឈរជើងនៅលំដាប់អ្នកឈ្នះកំពូល៕

ប្រភព៖ BNSPA