រយៈពេលប៉ុន្មានថ្ងៃមកនេះ សន្ធឹកនៃទឹកចិត្តរបស់ជនជាតិខ្មែរ ដែលនៅសមរភូមិកំពុងតែបន្តផ្តល់កម្លាំងចិត្ត និង រៀបចំសម្ភារ ស្បៀង របស់ប្រើប្រាស់ចាំបាច់ ព្រមទាំងថវិកាសម្រាប់ជូនទៅដល់កងទ័ពឈរជើងការពារទឹកដី និង ជនភៀសសឹកផងដែរ។
ក្រឡេកទៅមើលអ្នកស្ថិតក្នុងរង្វង់សិល្បៈក៏ដូចគ្នាដែរ កំពុងសស្រាក់សស្រាំស្រែករកការពិតសម្រាប់កម្ពុជា ដែលត្រូវបានចោរថៃឈ្លានពានមុនតាមរយៈសារសំឡេងគ្រប់រូបភាពរបស់ពួកគេ។ លើសពីនោះ ក៏មានសិល្បករ សិល្បការិនីជាច្រើនបានបង្កើតមូលនិធិស្វែងរកថវិកា និង ការទទួលនូវសម្ភារ ស្បៀង របស់ប្រើប្រាស់ចាំបាច់ ព្រមទាំងថវិកាសម្រាប់ជូនទៅដល់កងទ័ពឈរជើងការពារទឹកដី និង ជនភៀសសឹកដូចគ្នា។
ងាកទៅកាន់តារាចម្រៀងរ៉េប លោក Kwan ក៏មិនខុសពីបងប្អូនសិល្បករខ្មែរដទៃទៀតនោះដែរ បើគិតមកដល់ថ្ងៃទី ២៦ ខែកក្កដា ឆ្នាំ ២០២៥ នេះ គឺរយៈពេល ២ ថ្ងៃហើយ ដែលលោកបានរៀបចំទីតាំងប្រមូលស្បៀងជូនកងទ័ព និង ជនភៀសសឹកនៅមុខវត្តបទុម។
ក្នុងនោះដែរ ក៏មានការចូលរួមពីមហាជន ជាពិសេសនោះ តារាចម្រៀងរ៉េបជាច្រើន ក៏បានចូលរួមជាចំណែកនៃការបរិច្ចាគថវិកា ស្បៀងអាហារ សម្ភារនានា និង បានជួយជាកម្លាំងក្នុងការរៀបចំដឹកជញ្ជូនទៅឱ្យកងទ័ព និង ជនភៀសសឹក។
គួរជម្រាបថា លោក Kwan បានរៀបចំកម្មវិធីខាងលើកាលពីថ្ងៃទី ២៥ ខែកក្កដា មកម្ល៉េះ ដោយលោក និង ក្រុមការងារបានរង់ចាំទទួលការបរិច្ចាគតាំងពីម៉ោង ៨ ព្រឹក ដល់ម៉ោង ១០ យប់។ ដោយឡែកនៅព្រឹកថ្ងៃទី ២៦ ខែកក្កដា នេះ លោក Kwan នឹងរៀបចំមួយព្រឹកទៀត ដោយបញ្ចប់ត្រឹមម៉ោង ១២ ថ្ងៃត្រង់ ព្រមទាំងដឹកជញ្ជូនទៅរសៀលនេះតែម្តង៕
