នាពេលថ្មីៗនេះ ផ្នែកតម្រងនោមនៃមន្ទីរពេទ្យមិត្តភាពកម្ពុជា-ចិន ព្រះកុសមៈ បានចែករំលែកចំណេះដឹងមួយអំពីជំងឺតម្រងនោម Nephropathy មានន័យថាជាជំងឺ ឬ ការខូចខាតនៃតម្រងនោម ខណៈជាអាការៈទូទៅ ប្រើសម្រាប់ពណ៌នាអំពីសភាពណាមួយដែលប៉ះពាល់ដល់សមត្ថភាពរបស់តម្រងនោមក្នុងការចម្រាញ់ឈាម បញ្ចេញកាកសំណល់ គ្រប់គ្រងជាតិទឹក សម្ពាធឈាម និង អេឡិចត្រូលីតក្នុងរាងកាយ។
ក្នុងនោះ ខាងមន្ទីរពេទ្យបានបញ្ជាក់រោគសញ្ញា នៃជំងឺតម្រងនោម Nephropathy ដែលមានដូចជា៖
– ហើមជើង កជើង ឬ ជុំវិញភ្នែក
– លើសឈាម
– ទឹកនោមមានពពុះ (មានប្រូតេអ៊ីនក្នុងទឹកនោម)
– អស់កម្លាំង ឬ បាត់បង់ចំណង់អាហារ
– ធ្លាក់ចុះនូវបរិមាណទឹកនោម (នៅដំណាក់កាលធ្ងន់)
ចំពោះការធ្វើរោគវិនិច្ឆ័យ មានដូចជា ៖
– តេស្តទឹកនោម (រកប្រូតេអ៊ីនឬ ឈាម)
– តេស្តឈាម (Creatinine, eGFR)
– រូបភាពវេជ្ជសាស្រ្ត (អ៊ុលត្រាសោន, CT scan)
– កាត់យកកោសិកាតម្រងនោម (Biopsy) ក្នុងករណីចាំបាច់
ចំពោះការព្យាបាល (អាស្រ័យលើមូលហេតុ)៖
– គ្រប់គ្រងជាតិស្ករក្នុងឈាម (សម្រាប់អ្នកជំងឺទឹកនោមផ្អែម)
– គ្រប់គ្រងសម្ពាធឈាម (ប្រើថ្នាំ ACE inhibitors / ARBs)
– កាត់បន្ថយប្រូតេអ៊ីនក្នុងទឹកនោម
– ប្តូររបៀបរស់នៅ៖ កាត់អំបិល បោះបង់ការជក់បារី និងហាត់ប្រាណ
– លាងឈាម ឬ ផ្សាំតម្រងនោមនៅដំណាក់កាលចុងក្រោយ៕
ប្រភព ៖ ផ្នែកតម្រងនោមនៃមន្ទីរពេទ្យមិត្តភាពកម្ពុជា-ចិន ព្រះកុសមៈ
