នៅថ្ងៃទី ២០ ខែតុលា ឆ្នាំ ២០២៥ លើបណ្ដាញសង្គមហ្វេសប៊ុកមហាជន អ្នកគាំទ្ររបស់បវរកញ្ញា កុយ អេនណា បានផ្ទុះចាប់អារម្មណ៍ចែករំលែកខ្លាំង ក្រោយឃើញហ្វេសប៊ុកផេករបស់បវរកញ្ញារូបនេះ បានបង្ហោះលិខិតបំភ្លឺបកស្រាយសាធារណៈដល់មហាជនជុំវិញរឿងភាន់ច្រឡំមួយ ធ្វើឱ្យប៉ះពាល់ដល់កិត្តិយសរបស់នាង។
ចំពោះការចេញលិខិតបំភ្លឺជាសាធារណៈនេះ បវរកញ្ញា កុយ អេនណា បានធ្វើឡើង ក្រោយមានគណនីហ្វេសប៊ុកមួយឈ្មោះ Makara Moum បានបង្ហោះនូវ Status ជាច្រើន កាលពីថ្ងៃទី ១៩ ខែតុលា ឆ្នាំ ២០២៥ កន្លងទៅនេះ ដែលជាព័ត៌មានមិនពិតនាំឱ្យមហាជនមានការភាន់ច្រឡំ ដែលពិតជាធ្វើឱ្យមានការប៉ះពាល់យ៉ាងខ្លាំងដល់កិត្តិយស សេចក្ដីថ្លៃថ្នូរ ប្រជាប្រិយភាព និង ការងាររបស់នាង។
តាមរយៈលិខិតបំភ្លឺនេះបានឱ្យដឹងថា គណនីហ្វេសប៊ុក Makara Moum (ហេង មករា) បានបង្ហោះសារជាច្រើន ទាក់ទងនឹងការងារផ្សព្វផ្សាយផលិតផល ដោយបាននិយាយសំដៅលើបវរកញ្ញា កុយ អេនណា ថាទទួលធ្វើការងារផ្សព្វផ្សាយផលិតផលឱ្យក្រុមហ៊ុនរបស់ខ្លួន និង បានទទួលលុយកក់រួចហើយ តែមិនមានឃើញការបង្ហោះផ្សព្វផ្សាយផលិតឱ្យក្រុមហ៊ុន ជាហេតុធ្វើឱ្យគណនីហ្វេសប៊ុកខាងលើ បានបង្ហោះសារឱ្យកញ្ញា កុយ អេនណា និង អ្នកទាក់ទងការងារឈ្មោះ Riko Riko ចេញមកទទួលខុសត្រូវ។
ក្នុងនោះដែរ កញ្ញា កុយ អេនណា ក៏បានបកស្រាយឱ្យដឹងថា នាងមិនធ្លាប់ស្គាល់ ឬធ្លាប់ទាក់ទងដោយផ្ទាល់ជាមួយម្ចាស់ប្រេន MKM ដែលមានគណនីហ្វេសប៊ុក Makara Moum នោះទេ។ លើសពីនេះ នាងក៏បានបញ្ជាក់ច្បាស់ៗថា កន្លងមកនាងពុំមានការចុះកិច្ចព្រមព្រៀងការងារ និង ទទួលកម្រៃ ដើម្បីទទួលការងារផ្សព្វផ្សាយផលិតផល ដូចដែលការបង្ហោះរបស់ម្ចាស់ប្រ៊េនរូបនោះលើកឡើងឡើយ៕
