ការសិក្សាថ្មី! ហាណូយ និង បាងកក ជាប់ក្នុងចំណោមទីក្រុងមានការឆបោកអ្នកទេសចរច្រើនជាងគេបំផុត

តាមការសិក្សាថ្មីមួយដែលធ្វើឡើងដោយវិទ្យាស្ថាន Mastercard Economics ស្រង់យកមកចេញផ្សាយដោយសារព័ត៌មាន CNBC បានបង្ហាញថា ទីក្រុងហាណូយ ប្រទេសវៀតណាម និង ទីក្រុងបាងកក ប្រទេសថៃ ដែលស្ថិតក្នុងចំណោមគោលដៅទេសចរណ៍ដ៏ល្បីល្បាញបំផុតនៅអាស៊ីអាគ្នេយ៍ បានជាប់ក្នុងចំណាត់ថ្នាក់ទីក្រុងដែលមានការឆបោកអ្នកទេសចរខ្ពស់ជាងគេបំផុត។

នៅបាងកក ឡានតាក់ស៊ី ឬ សេវាឡានឈ្នួលត្រូវបានរកឃើញមានករណីឆបោកដល់ទៅ ៤៨% ដែលធ្វើឱ្យក្រុងមួយនេះជាប់ជាកន្លែងមានការឆបោកខ្លាំងជាងគេបំផុតដែលផ្ដោតលើភ្ញៀវទេសចរ។ ភ្ញៀវបរទេសជាច្រើនក៏មានការរាយការណ៍ពីករណីចាញ់បោកដោយអ្នកផ្ដល់សេវាកម្មម្ហូបអាហារផងដែរ។

តាមការបញ្ជាក់លម្អិតក្នុងរបាយការណ៍ដែលបានសិក្សានោះបានបង្ហាញថា ភ្ញៀវទេសចរទៅលេងទីក្រុង Cancun ប្រទេសម៉ិកស៊ិក ទីក្រុងហាណូយ ប្រទេសវៀតណាម ទីក្រុង Dhaka ប្រទេសបង់ក្លាដេស និង ទីក្រុងបាងកក ប្រទេសថៃ គឺមានកម្រិតការឆបោកខ្ពស់ជាងគេបំផុត ខណៈទីក្រុងដែលមានការឆបោកទាបជាងគេបំផុតរួមមានទីក្រុង San Francisco, Dublin, Seoul, Budapest និង Edinburgh។

សម្រាប់ប្រភេទឆបោកដែលរកឃើញមានតាមបណ្ដាក្រុងក៏មានកម្រិតខុសៗគ្នាដែរ ជាក់ស្ដែង ការឆបោកតាមតាក់ស៊ី និង ឡានឈ្នួលមានត្រឹម ២% ប៉ុណ្ណោះក្នុងទីក្រុងដូចជា ហុងកុង និង Barcelona ខណៈនៅទីក្រុង Jakarta ប្រទេសឥណ្ឌូនេស៊ី មានរហូតដល់ ៦៦%។

គួរឱ្យដឹងផងដែរថា បើតាមការសិក្សាពីវិទ្យាស្ថាន Mastercard វិស័យទេសចរណ៍គឺនៅតែស្ថិតក្នុងការរងគ្រោះខ្ពស់លើករណីឆបោក ដោយករណីនេះកាលពីឆ្នាំ ២០២៤ បានកើនឡើង ១៨% អំឡុងរដូវក្ដៅ និង ២៨% នៅរដូវរងា៕

ប្រភព៖ VN Express, The Nation