ថ្មីៗនេះ Jaipur ដែលជាទីក្រុងរងការបំពុលបរិយាកាសខ្លាំងក្លាបំផុតមួយនៅឥណ្ឌា បានសម្រេចធ្វើការដំឡើងម៉ាស៊ីនបន្សុទ្ធខ្យល់តាមដងផ្លូវ កាលពីយប់ថ្ងៃទី ១២-១៣ ខែវិច្ឆិកា ឆ្នាំ ២០២៥ កន្លងទៅ និង ដាក់ដំណើរការកាលពីថ្ងៃទី ១៥ ខែវិច្ឆិកា ដើម្បីកាត់បន្ថយខ្យល់អាក្រក់ ព្រោះតាមការឱ្យដឹង សន្ទស្សន៍គុណភាពខ្យល់នៅទីក្រុងនេះគឺអាក្រក់ខ្លាំង មានកម្រិតលើស ១៩០ ទៅទៀត។
បង្គោលម៉ាស៊ីនបន្សុទ្ធខ្យល់កម្ពស់ ៨ ម៉ែត្រ ត្រូវបានដំឡើងនៅតាមទីតាំងដែលមានចរាចរណ៍ច្រើនដូចជានៅរង្វង់មូល Jawahar និង ផ្លូវ Tonk ជាដើម។ ក្នុងម៉ាស៊ីនមួយដើម អាចបន្សុទ្ធខ្យល់បានជិត ១ លានម៉ែត្រគូបក្នុងមួយម៉ោង។
ជាមួយគ្នានេះដែរ ខាងមន្ត្រីប្រចាំក្រុងក៏បានរៀបចំសកម្មភាពឃោសនាមួយចំនួន ដើម្បីជួយពលរដ្ឋឱ្យយល់ដឹងពីដំណើរការនៃប្រព័ន្ធម៉ាស៊ីនបន្សុទ្ធខ្យល់នេះ។
បន្ថែមពីនេះ ពលរដ្ឋទាំងអស់ក៏ត្រូវបានជំរុញឱ្យរួមគ្នាធ្វើតាមវិធានការមួយចំនួនផ្សេងទៀតដូចជា កាត់បន្ថយប្រើប្រាស់យានយន្តបើមិនចាំបាច់ និង បញ្ចៀសការដុតនានា ដើម្បីជាការជួយឱ្យគុណភាពខ្យល់ក្នុងក្រុងបានប្រសើរឡើងវិញ៕
