ថ្មីៗនេះ នៅក្នុងបណ្តាញសង្គមរបស់ចិន ផ្ទុះការចែករំលែកមិនតិចឡើយ ទាក់ទងនឹងកន្លែងហាត់ប្រាណមួយ ដែលបើកឱ្យមានការប្រកួតសម្រកគីឡូ ដោយមានរង្វាន់ធំ ជាឡានទំនើប Porsche មួយគ្រឿង។
តាមព័ត៌មានបានឱ្យដឹងថា កន្លែងហាត់ប្រាណមួយនេះ នៅទីក្រុង Binzhou ខេត្ត Shandong ម្ចាស់កន្លែងបានបើកការប្រកួតសម្រកគីឡូមួយ ដែលមានរង្វាន់ជាឡានទំនើបម៉ាក Porsche Panamera សេរីឆ្នាំ ២០២០ មួយគ្រឿង ដោយលក្ខខណ្ឌ គឺតម្រូវឱ្យអ្នកចូលរួមស្រកទម្ងន់លើសពី ៥០ គីឡូក្រាមក្នុងរយៈពេល ៣ ខែ។ ក្នុងនោះ ការប្រកួតទទួលអ្នកចូលរួមត្រឹម ៣០ នាក់ប៉ុណ្ណោះ ហើយត្រូវបង់ប្រាក់ចូលប្រកួតចំនួន ១០ ០០០ យ័ន ដែលស្មើប្រមាណ ១៥០០ ដុល្លារ។ ថ្លៃចុះឈ្មោះនេះដែរ គឺសម្រាប់ការជួយហ្វឹកហាត់ និងណែនាំពីគ្រូជំនាញរបស់កន្លែងផ្ទាល់ រួមទាំងថ្លៃអាហារមួយថ្ងៃ ៣ ពេល និងការស្នាក់នៅចំនួន ៣ ខែពេញ។
ខាងម្ចាស់កន្លែងហាត់ប្រាណបានបញ្ជាក់ឱ្យដឹងថា ខ្លួនមិនបានបង្កើតការប្រកួតនេះដើម្បីឱ្យល្បីនោះទេ ប៉ុន្តែផ្ទុយទៅវិញគឺដើម្បីជំរុញមនុស្សឱ្យចាប់អារម្មណ៍លើសុខភាព និងការហាត់ប្រាណ។ ដោយឡែក អ្នកជំនាញបានឱ្យដឹងថា ការសម្រកទម្ងន់បែបនេះវាអាចមានការពិបាក និងគ្រោះថ្នាក់ស្របជាមួយគ្នា ជាពិសេសគឺអាចបណ្តាលឱ្យមានផលប៉ះពាល់ដូចជាខូចខាតសាច់ដុំ និងអតុល្យភាពអ័រម៉ូនជាដើម៕
